www.beates-bunte-bilder.de

Biikebrennen in Keitum am 21.02.2005

Die  Biike-Reden 2008 auf friesisch
jeweils als pdf durch Klicken zu öffnen

Biike Westerland auf friesisch  

Biike Morsum 2008 friesisch:

Biike Rantum 2008 friesisch:

Biike Keitum 2008 friesisch

Biike Westerland auf deutsch

Biike Tinnum 2008 deutsch

Biike Morsum 2008 deutsch

Biike Rantum 2008 deutsch

Biike Hörnum 2008 deutsch

Die  Biike-Reden 2007 auf friesisch

Biike Norddörfer 2007:

Lef Sölring Lönslir, lef Jungen, lef Frinjer.

Nü sen wü weder jir tohopkemen om me arküder Biike tö fiiren. Wat es hat, wat üs sa nai gair bi dit Fest?  For mi bedüütet Biike : Itüüs. Sa es dit altert wessen en ik weet, sa est for maning Sölring jir. Ik haa muar üs 40 Jaar hurüders lewet. Dit wer sa tö di Tir, wan wü fan Skuul kemmen sen. Hat jaav ek for altermaal aarber jir. Nü es hat jaa weder sa, en ek bluat for aarber, non, fuaral om uning tö finj skel di Jungen tö Fastlön. Man wan et gair, da kumt em tüs for Biike en Pidersdai, uk wan em bluat for 3 of 4 Daagen bliiv ken.
Wü skel jaa me Biike de Wunter faarwel sii, man wü haa ja jit niin Wunter her. Di paar rocht kuul Daagen ken wü jaa ek reekni. Wü skel dach hol jit en betken Sne en Kol haa. Storemer en Riin haa wü jaa noch her. Üp üder Sir: Wann wü al di Riin, wat wü di leest 3 Muun haa her üs Sne fingen her, da wer wü uk ek töfreer wessen.  Di leest Somer es jaa rocht sa lung wessen, mesken kummt de Wunter jaa tö Puask. Man dit wel wü ek hööpi. Hat bleft üs nönt üders üs oftöteeven, wat dit Jaar üs bringt.
Nü wenske ik ju en faine Biikeinj en fuul Formaak for Pidersdai.  Faarwel en kum gur tüs.

Inge Hammerich, 21. 02. 2007, Norddörfer

Biike Tinnum:

Biiki bi Tinnem Borig 2007

Biiki fan Söl, helig ual Jöl,

flami āp, skiin aur üüs Lön,

sa üs dü altert heest dön.

Fuaraalerns Wiis es jit itüüs,

hur om Hoog Sölring jir stuun,

truu töhop, üs wü dit uun.

Lef Sölring Lönslir, lef Frinjer,

lef Gasten fan nai en fiir,

Ik grööt juu altermaal tö’t Biikebrenen 2007 jir bi Tinem Borig.

Ark Jaar sen ik üp niist forwunert, hur fuul Mensken jam di  21.Februwaari üp Wai maaki, om bi’t Biikebrenen diar bitöwiisen. Ik haa dit Gifööl, hat uur fan Jaar tö Jaar muar. Üüs Jungen, üüs Frinjer kum ometiin tüs tö Söl, Freemern, Gasten sen bi üüs. En ik weet, dat Sölring, diar bütlöns uuni, ön Amerika en uk ön Australien of uk jit hur üđers, deling om üüs teenk en üüs Sölring Önspraaken aur’t Internet forföligi. Di Wārel es sa ja dach litjer uuren!

En uk dānen Mensken bütlöns grööt ik fan des Stiar rocht fan Harten en röp juu tö: „Wü teenk om juu!“

Di Bidüüding üt ual Tiren heer Biiki deling ek muar:

Hat uur ek muar om en gur Baricht böören, wü driif me dit Jöl ek di Wunter üt  (wü haa ja binai niin Wunter muar !!) en wü sii uk niin “Farwell” tö Seelir. Man di Bedüüding, dat Mensken jer töhop kām, om iinig for wat tö beeren, dit ken deling uk jit sa wiis. Töhopstuun, iintreer diarfuar, dat üüs Spraak förter spreeken uur, dat di Spraak liirt uur ön di Skuul, dat üüs Brükdom üüs bihölen bleft, dat wü aurhaur fuar dit iintreer, wat Söl brükt, om dat üüs Ailön aurlewi ken!!

Ik teenk ek bluat diarom, dat üüs Küst ön Gifaar es. Di leest Storemer haa weeget, wat Winj en Weeter önrocht ken üp Strön en di Klefkanten. Uk diar jeft et fuul tö dön.

Man ik sen fast aurtjüüt, dat wü dit bluat skafi, wan wü muar en beeter me arküđer forlikki en muar iinig sen me- en öner-arküđer.Om di Iinighair sjocht dit üp Söl tö Tir ja man rocht sa truurig üt. Ark litj Teerp, ark Gimiindi kööket sin ain Waling en di jen weet ek, wat di üđer jüst bislööten heer. Diarbi es dit dach gaar ek sa swaar tö bigripen, dat wü om fuules starker sen en muar üp Wai bring ken, wan wü altermaal töhopstuun.

Dit Töhopstuunen, di Iinighair öner- en me-arküđer, dit haa üüs Fuarfaaren beeter kür en diarfan skul wü eegentlich liir. Wan wü bütlöns sen üp Raisin en fraaget uur, hurfan wü kum, da swaari wü rocht sa mans: „Wü kum fan Söl!“ Man knap sen wü weđer itüüs, da kum wü weđer üt 12 forskelig Teerper of Gimiinden. Diar ken dach wat ek stemi!

Teenk altermaal diaraur eđer, aur’t Töhophualen, aur Iinighair! Arkenjen fan üüs es diartö āprööpen!

Da sen wü gur diarfuar, wan wü me Aurtjüüing sii ken:

   „Biiki fan Söl, helig ual Jöl,

    Aalerns Wiis  es  jir itüüs en Iinighair uunet bi üüs!“

Fuul Dank!

                                                                                                                                                                 Inge Gieppner-Carstensen    21.02.2007

Biike Westerland 2007:

Biiki 2007 ön Weesterlön āāēēēēēēēđđđ

Flami āp, Biiki fan Söl!

Sa tjen wü dit Jöl

Tö Iaren fan Söl,

üs Gröötnis fan Strön

fan Lön en tö Lön!

Helig ual Jöl, üüs Biiki fan Söl,

bren Dü en ljucht, üs Dü altert heerst dön!

Dat wü uk teenk, alhur wü uk sen:

Söl es üüs Ain, diar leeng wü dach hen!

Wārel es kuurt, üs Tiren sen kuurt,

let üüs da löwi Fuarfaarens Uurt:

Sölring üüs Uurt en Sölring üüs Wiis,

skiin üüs döör Winj en Weđer en Diis.

Ljucht Dü, üüs Biiki, wārem en klaar,

Ljucht uk en Tiren, diar junk sen en swaar!

Let üüs da löwi, glemen üs Jöl:

Oler forgung skel üüs Biiki fan Söl!

Min lef sölring Lönslir, Weesterlöning en Gasten!

Me di diarem Dechting heer Johann Frank fuar fuul Jaaren sin Önspraak tö Biiki bigent. Tö Jen fortelt hi altert, hur uak hi wiar, om Föligsters tö finjen, diar dit ön Tökumst fan höm aurnem kür. Üs Stadtvertreterin fan Weesterlön en en hualef Friis – ik sen jir üp Söl tö Wārel kemen en sen üüs Ailön langsen truu forbünen wesen – bigrööt ik juu altermaal tö üüs Biikibrenen 2007. Medsalef maat ik üđern Mur maaki, dit uk tö dön. Ön üüs Famiilji waar langsen Dütsk spreeken, man in´t Hüs fan min Grootmooter waar bluat Sölring snaaket.  Ön Merelskuul liirt ik da muar Sölring bi min ual Skuulmaister hans Lassen.

Üs ik nü tösair her, juu jir tö Biiki tö igrööpten, haa ik mi weđer muar me üüs Spraak bifaatet en morken, dat ik dit, wat ik liirt haa, ek auriiten haa. En diarfuar teenk ik, dat dit uk jir mung üüs junger Weesterlönning jeft, diar ön di naist Jaaren jir stuun ken en di Biiki-Önspraak hual ken.

Di Bidüüding fan Biiki es ual en heer fuul skeft, hat wwar ön ualing Tiren om en gurt Bāricht  böören, em wul di Wunter diarme fordriif, em wul Got Weeden Iar bring en ön di Tir fan di Grönlön-Faarten wiar di Biiki-Jöl en leest Faarwel tö di Seelir, diar ütfan ging.

Biiki heer fuar üüs jit langsen en gurt Bidüüding, wü raaki ual Frinjer, wü snaki en sjung en sa kumt dit, dat uk fuul Sölring, diar ek muar jir uuni, ometiin tö Biiki tüs kum tö Söl, om tö weegen: „Söl es üüs Itüüs!“

En sa let üüs me arküđer üüs bikeent Leedji «Üüs Sölring Lön» sjung hur dit jen Stiar jit:

„Wü blef me di – me Söl – ark Tir forbünnen!“

Fuul Dank!

Ulla Lunk – Lorek, 21. 02. 2007

Biike Keitum 2007

Biike 2007 Archsum

Biike 2007 Hörnum